ललितपुर । नेपाल सुपर लिग (एनएसएल) २०२५ को लिग चरणमा प्रभावशाली प्रदर्शन गर्दै साविक विजेता ललितपुर एफसी ले पुनः आफ्नो दमदार उपस्थितिको सङ्केत दिएको छ। सोमबार सम्पन्न खेलपछि ललितपुरले क्वालिफायर वान खेल्ने पक्का भएको हो।
ललितपुरले अहिलेसम्म खेलेका ५ खेलमा ११ अङ्क जोडेको छ, जसमा टोली अपराजित रहँदै उत्कृष्ट लयमा देखिएको छ। समान अंकसहित धनगढी एफसी गोलअन्तरका आधारमा अघि रहे पनि दुवै टिमले शीर्ष दुई स्थान सुरक्षित गर्दै क्वालिफायर वानको स्थान पक्का गरेका छन्।
ललितपुरको सोमबार खेल नभएपनि एफसी चितवनमाथि काठमाडौं रेजर्सको जितले ललितपुरको स्थान सुरक्षित गरिदियो। योसँगै ललितपुरको प्लेअफ यात्रा निश्चित भएको हो, जसले टोलीको स्थायित्व र सामूहिक प्रयासलाई देखाउँछ।
गत संस्करणको विजेता रहँदा पनि यसपटक ललितपुरले आफ्नो खेल कौशल र सामूहिक समन्वयलाई अझ बलियो बनाउँदै आएको छ। लिग चरणमा धनगढीसँगको खेल गोलरहित बराबरीमा टुंगिएको थियो, जसले क्वालिफायर वानमा हुने सम्भावित रोमाञ्चक भिडन्तको सङ्केत गर्दछ।
अब ललितपुर एफसीको ध्यान क्वालिफायर वानमा उत्कृष्ट प्रदर्शन गर्दै फाइनलमा स्थान सुरक्षित गर्नेमा केन्द्रित हुनेछ।
